مش بس الاساطير والحكايات الخرافية هي اللي ارتبطت بالقطط من مئات السنين، لكن حتى ارتكابهم للجرائم كمان ما بين جرائم القطط كانوا هم الجاني فيها بالفعل وما بين جرائم تانية عجيبة المجرمين حاولوا يلفقوا التهمة فيها للقطط.

تحريض على السرقة

في صيف عام 2013 في ولاية بنسلفانيا الامريكية جيمس انسوني اخد مسدس لعبة وسرق عربية وطلع يسرق بيها بنك دخل ثبت الامن وعمل حركتين حلوين لكن كل اللي عرف يطلع بيه من الموظف كانوا 1500 دولار فقط لا غير لكن من سربعته بقى وهو بيخلع من البنك وقع منه جزء من 1500 دول كمان وكل اللي خرج به هم 900 دولار اول عن اخر.

وركب العربية والبوليس وراه ومن هنا لهنا دخل في واحدة من عربيات الشرطة اللي بتطارده وفي النهاية قبضوا عليه.

لحد دلوقتي جريمة سطو مسلح على بنك ما فيهاش اي مشاكل ياما ناس بتهب في دماغها حركات من بتاعة الافلام قبل ما يرجعوا يندموا ويندبوا حظهم.

بس في الواقعة دي انه لما تحقق مع الراجل ده قال لهم انا عملت كده غصب عني وبالاكراه.

طب مين يا حبيبي اللي غصب عليك؟ قال لهم العقل المدبر للجريمة دي القطة بتاعتي كل يوم تزن علي وتغصب علي اني اسرق ومش سايباني في حالي.

العجيب بقى انه ما كانش بيهزر ولا حاجة فعلا كان مقتنع ان القطة بتتكلم معه وانها بتغصبه علي السرقة وبعد ما عرضوها على متخصص نفسي اتحكم عليه حكم مخفف مدته سنتين ونص في السجن.

وبالمناسبة دي تفتكروا فعلا كان مريض نفسي هو اللي عرف يضحك على القاضي وعلى فريق الاطباء اكتبوا لنا في التعليقات .

جريمة قتل

في مايو عام 2013 ميلادية بريت ناش صاحب 46 سنة حط خطة جهنمية لسرقة بنك، الخطة هتبدأ بمشاركة زوجته وهتنتهي بتلفيق التهمة لقطة.

والخطة كانت كالاتي ناش كان مراقب محامي عايش لوحده وطلب من مرات انها تستدرجه برة البيت قبل ما هو وصاحب ليه يضربوه ويدخلوه عربيتهم بالعافية.

بعدها هيربطوا على وسطه قنبلة مزيفة وهيجبروه انه يسرق بنك لحسابهم وعلى حسب الخطة اللي محطوطة بعد ما يستلموا منه الفلوس هياخدوه من ايده ويطلعوا بها على بيته ويرغموه انه يحط نفسه في بانيه الحمام بعد ما يملوه على اخره بالمية ويوقعوا اي جهاز كهربائي في المية بحيس ان المحامي ده يتكهرب ويموت.

يعني حرامية وقتالين قتلى كمان، وعلشان يظهروا ان الحادث قضاء وقدر هيجيبوا القطة بتاعة المحامي يحبسوها معه في الحمام بحيث يبان كأنها هي اللي وقعت الجهاز الكهربائي في المية والراجل في الحمام وتشيل هي الليلة. وبالرغم من ان الخطة تبان وكأنها محكمة انه الحمد لله محصلتش.

الراجل مراته فضحته وسجلت له وهو بيسرد عليها الخطة في التليفون وقدمت التسجيلات للشرطة وفي النهاية اتحكم على بريت ناش بالسجن لمدة عشرين سنة ونجت القطة من محاولة تلفيق التهمة لها.

امتصاص أرواح الأطفال

من اغرب الجرائم اللي تم اتهام القطط فيها امتصاص ارواح الاطفال، القصة دي تقدر تقول عليها كده انها اقرب للحكايات الخرافية بس المشكلة ان في حادسة حصلت كبرت الفكرة في دماغ الناس وساعدت في انتشارها جامد.

صحيفة انجليزية نشرت في عام 1791 ميلادية عن حادثة غريبة وقعت بالقرب من مدينة بلايمس البريطانية.

وبحسب الصحيفة الحادثة دي راح ضحيتها طفل بعد ما القطة سحبت انفاسه لحد ما مات وبغض النزر عن ان ما فيش اي دليل على صدق الواقعة دي الا ان من ساعتها ونسخ كتير منها بدأت تتقال وتتعاد عشرات السنين بروايات مختلفة.

بل ان الاتهام الغريب للقطط ده كان موجود لحد اوائل القرن العشرين.

سبيدي والسرقة

على عكس الخرافات ومحاولة تلفيق التهم للقطط القط المرة دي مزنب مية في المية، القط سبيدي كان معتاد انه يتحرك بخفة في الحي اللي صاحبه ساكن فيه.

وكان يسرق اي حاجة يلاقيها في جناين الجيران ويرجع بها على بيت صاحبه، يسرق بقى هدوم كور اي حاجة يعرف يمسكها يسرقها وصاحبه بعد ما لاحظ القصة دي ما بقاش عارف يتصرف ازاي ولا ازاي حتى يرجع الحاجة المسروقة لاصحابها.

خصوصا انه اصلا مش عارف الحاجة دي بتاعة مين وبناء عليه قرر ان اي حاجة يلاقي القط بتاعه سارقها يجمعها ويحطها في الجراج عنده وعلق يافطة كتب عليها لو حد مسروق

من متعلقاته ييجي يدور عليها عندي غالبا القط سبيدي هو اللي سارقها.

شريك في الجريمة

في عام 2012 تم العثور على جزء من جسد بني ادم مقطوع وملفوف في ستار

ومرمي في منتجع سياحي بمدينة بورتسموث  البريطانية وبعد التحقيقات اكتشفوا ان الجزء اللي عسروا عليه بيرجع لراجل اسمه ديفيد جاي بس المشكلة ان المحققين ما لقوش اي دليل يذكر على القاتل ولا بصمات ولا حمض نووي ولا اي حاجة، الحاجة الوحيدة اللي لقوها شعرة من جسم قطة على الستارة اللي كان ملفوف بها الجسم.

وفي بريطانيا عاملين قاعدة بيانات مصغرة بيجمعوا فيها الحمض النووي للقطط هناك وباستخدام قاعدة البيانات دي ومطابقة الشعر اللي لقوه وصلوا للقط ولصاحبه.

القط المسجل باسم تنكر كان مملوك لشخص بريطاني اسمه ديفيد هيلدر واللي من خلال التحقيق معه تم العسور على ادلة تأكد ضلوعه في الجريمة ومن هنا ساعد القط تنكر في حل الجريمة والوصول للقاتل.

ومن المفارقات العجيبة ان تنكر ده لو كان بني ادم كان زمانه اتحاكم هو كمان كان مشارك في الجريمة حتى لو كان كل اللي عمله انه وقف واتفرج على الضحية وهي بتتقتل.

سرقة ألعاب

في جنوب غرب بريطانيا في بلدة سويندون بيعيش قط غريب اسمه فرانكي.

فرانكي ده كان غاوي سرقة، لكن مش اي سرقة وخلاص كان متخصص سرقة العاب والعاب بعينها كمان.

جولي بيشيب صاحبة القط ده او القطة دي كانت بتصحى كل يوم الصبح تبص عليه وتفاجأ ان الالعاب بتاعته زادت لعبة لأ وايه نفس شكل الالعاب اللي عنده بالفعل والموضوع فضل يتكرر بشكل غير طبيعي.

لدرجة انها حست ان القط بتاعها عنده قوة خارقة وبيستنسخ الالعاب وقتها القط كان متعود انه يتسلل لبيوت الجيران وينقي الالعاب اللي تشبه العابه ويسرقها.

ومن كتر مهارة القط ده في الحركة دي جولي كانت بتقول انها ممكن تغيب عن عنيها عشرة خمستاشر دقيقة بالكتير وهوب ترجع بلعبة.

وفي عام 2007 جابت للبيت 35 لعبة ما بين دباديب صغيرة والعاب كتير على اشكال حيوانات وكلهم شبه بعضهم.

حريق متعمد

الامريكي مايكل بول صاحب 48 سنة كان عنده مشروع خاص بشاحنات النقل وكان وقتها كان بيواجه تعسرات مادية في مشروعه واضح كده ان ورقه ما كانش سليم.

فلما جاله اعلام ان وزارة النقل الامريكية هتعمل له تدقيق قرر انه يدمر اي ادلة او اوراق معه ممكن تدينه وبما ان اوراق الشغل الخاصة به كان محتفظ بها في بيته فتوصل بول انه يحرق شقته بالورق اللي فيها.

بس ازاي يعمل كده من غير ما يتكشف الملعوب، في عام 2016 بعتر بول الورق بتاعه في غرفة المعيشة كانه كان قاعد بيراجعهم او حاجة. ونزل اشترى شجرة كريسماس من النوع الجاف جدا ورجع زين الشجرة بحلي وادوات شديدة الاشتعال وعلشان يسبق العملية اكتر اتبنى قطة وسبها في البيت لوحدها جنب الشجرة وخد بعضه ونزل يراقب من تحت.

وبالفعل نجحت الخطة، القطة فضلت تلعب في الشجرة لحد ما وقعتها ومرة واحدة النار مسكت في الشجرة اول ما بول شاف الدخان خارج من الشقة جري بلغ الشرطة وقال لهم القطة هي السبب.

لكن من سوء حظه بقى المطافي وصلت اسرع مما كان متوقع ولحقوا الشقة والقطة والاوراق اللي كانت متنتورة واتقبض عليهم بتهمة الحريق المتعمد والقطة خدت براءة.

فردة الشراب

سواء عندك حيوان اليف او ما عندكش معظمنا بيعاني من ان شراباته بتختفي وغالبا بتبقى فردة واحدة من الاتنين الفردة التانية عادي بتفضل قاعدة.

بس المشكلة بقى اللي احنا بنواجهها في البيوت دي في حي كامل بيواجهها في المملكة المتحدة

القط المسمى هنري غاوي سرقة فرد شرابات من البيوت اللي حواليه. ويا ريته حتى بيسرق الفردتين مع بعض. فردة واحدة فقط.

وبحسب المالكة لويس براندن فعم هنري دوت سارق لوحده اكتر من سبعة وخمسين فردة شراب ولا واحدة فيهم شبه التانية.

اقرأ أيضا : كليوباترا ونهاية عصر الفراعنة.