الاطعمة الفاسدة ومنتهية الصلاحية من اكتر الحاجات اللي بتزعج الجهاز الهضمي بل انها ممكن تعمل حالة تسمم غذائي واي نعم تاريخ الصلاحية اللي مكتوب على المنتج بيعتبر من العوامل اللي بتساعد في تحديد السلامة بتاعة المنتج الا انه على حسب تصريح المجلس الوطني لاخصائية فالشكل العام واللون والرائحة هما المؤشرات الاهم لتوضيح سلامة المنتج من عدمه.

ووارد جدا ان بعض الاطعمة تتعرض للتلف بعد ساعات قليلة من فتح تغليفها واطعمة تانية تكون سليمة حتى بعد انتهاء تاريخ الصلاحية.

الأرز الأبيض

اشهر الحبوب علي الأطلاق وهو يعتبر غذاء أساسي علي مستوي العالم هو الارز وبينقسم الارز لنوعين رئيسيين هم الارز الابيض والارز البني.

وعلى الرغم من ان البني هو الاقل شهرة الا انه الافضل صحيا، بالاضافة كمان لانه بيمتلك القيمة الغزائية الاعلى.

الرز البني باختصار هو حباية الرز الكاملة الحباية اللي بتشتمل على كل العناصر الغذائية واللي هي الياف ومعادن وفيتامينات ومضادات اكسدة وحتى بروتين.

لكن الرز الابيض بقى فهو مجرد جزء من الرز البني. يعني الرزاية متقشرة وهو الجزء الداخلي اللي بيسمى بالسويداء والجزء ده بقى تقريبا بيتكون كله من الكربوهيدرات.

وعشان كده بتقل قيمته الغذائية جدا عن حبة الأرز الكاملة ولكن في نفس الوقت بترتفع مقاومته بطول عمره.

في الوقت اللي بيتراوح فيه عمر الرز البني ما بين 4 الي 6 اشهر فالرز الابيض ممكن بصلاحيته فترات اطول من كده بكتير واللي في بعض الاحيان وفي بعض الظروف ممكن تكون غير محدودة لكن ده طبعا في حالة احكام الغلق والحفز في مكان بارد وجاف.

المكرونة

نفس الكلام اللي قلناه على الرز بينطبق بقدر كبير على المكرونة الجافة وان كان المكرونة صمودها اقل شوية من الرز، لكن برضو لو تم حفظ المكرونة في ظروف جيدة يعني في كيس مقفول او اناء محكم الغلق ومحطوط في مكان جاف وجيد التهوية

تقدر تسافر عادي عشر سنين وترجع تاكل منها ما فيش اي مشاكل حتى لو كان تاريخ الصلاحية اللي مكتوب على الكيس بتاعها من قديم الازل.

اللي محتاج تعمله بس انك تعمل فحص ظاهري لها من ناحية الملمس واللون والرائحة زي ما قلنا في الاول.

اللحوم المصنعة

من المعروف ان منتجات اللحوم بانواعها بتتعرض للتلف بسرعة وعلشان كده كان الحل في اللحوم المطبوخة او المعلبة واللي هي باختصار يعني لحوم معالجة وده لانها كانت الوسيلة الوحيدة ان الجنود المعزولين في جبهات القتال يقدروا يتناولوا لحوم ويستفيدوا من البروتينات.

اللحوم المعالجة دي بقى هي لحوم مطبوخة مضاف لها مواد حافزة ونكهات وبعدين بيتم تعليبها واغلاقها بطريقة محكمة.

وبتتمتع النوعية دي من اللحوم بعمر طويل وقدرة على مقاومة مسببات التلف حتى بعد تاريخ الصلاحية اللي مكتوب عليها ما يخلص بكتير.

لدرجة ان واحدة من الشركات الأمريكية المنتجة للنوعية دي من اللحوم واللي هي شركة هورميل فودز بتقول ان منتجها بيعيش للابد في حالة عدم فتح المنتج ومن وجهة نظرهم ما دامت العبوة محكمة الغلق اللي جواها هيفضل صالح للاستعمال وان كانت الشركة مش بتنكر ان المنتج بتاعها جودته تتأثر بعد 3 سنوات من انقضاء تاريخ الصلاحية.

يعني ما بيبقاش بنفس الجودة اللي كان عليها وهو طازة لكن ضروري بقى نأكد هنا على قضية ان في فرق ما بين سلامة المنتج من التلف وهل المنتج ده صحي من الاساس ولا لأ؟

النوعية دي من اللحوم قيمتها الغذائية منخفضة عن اللحوم الطازة بلا خلاف بل ان المداومة على تناولها بكميات كبيرة ممكن تؤدي الى امراض خطيرة على المدى الطويل.

وبما اننا اتكلمنا عن اللحوم المعلبة فالجدير بالذكر ان الاطعمة المعلبة عموما وخصوصا البقوليات الجافة بتعيش فترات طويلة جدا.

لكن برضو نرجع لنفس الشرط وهو انها تبقى متخزنة بشكل سليم في مكان جيد التهوية وبعيد عن الاضاءة المباشرة.

وطبعا تكون العبوة نفسها سليمة من برة وما فيش فيها اي تلف خارجي والسبب في كده ان الاغذية المعلبة عادة بيتم اضافة مواد حافظة لها مع الملح والخل وهو الامر اللي بيخلق بيئة حمضية بتمنع اي بكتيريا من انها تتكون.

البسكويت المملح

البسكويت المملح واحد من المنتجات اللي بتحتفظ بسلامتها فترات طويلة جدا وطبعا السر في كده هو وجود الملح وبعض التوابل بكميات كبيرة بتخلي البكتيريا ما تقدرش تتكون وكمان بتساعد في امتصاص اسر الرطوبة لدرجة ان احد انواع البسكويت المملح ده والمعروف بنوع اسمه هارتاك موجود منه قطعة معروضة في متحف بنساكولا بولاية فلوريدا الامريكية.

بيرجع تاريخ تصنيعها لعام 1862 واتشهر البسكوت ده خلال القرن 18 باسم خبز البحارة.

وده لانه كان يعتبر القوت الاساسي للبحارة خلال الرحلات الطويلة وبيقال كان ان البسكوت المملح ده كان موجود من العصور القديمة وكان احد الاطعمة الرئيسية للجنود والبحارة من عصر الاسكندر الاكبر.

وكان بيتم تصنيعه من الدقيق والمية والملح لكن بقى الانتشار التجاري كان في اواخر القرن 18.

اما مصطلح خبز البحارة نفسه او خبز السفن او خبز الجنود فكان من ابتكار البحارة الامريكان خلال حرب 1812 مع الامبراطورية البريطانية وبعدها انتشر الاسم وتم تصنيعه باشكال وانواع كتير.

العسل

عسل النحل الطبيعي هو تقريبا غذاء صالح للابد وهو اقوى انواع الاطعمة اللي بتقدر تحافظ على نفسها مهما طال عليها الزمن لدرجة انه تم العثور على جرار من الفخار موجود جواها عسل من عهد المصريين القدماء.

وكان العسل اللي جواها صالح للاستخدام بصورة طبيعية جدا وبترجع قوة العسل الرهيبة دي للتقنيات المعقدة اللي بيعملها النحل خلال مراحل التصنيع.

وده بسبب تعدد الانزيمات اللي بتفرزها النحلة بداية من عملية جمع الرحيق لحد عملية الانتاج النهائي وعملية انتاج الانزيمات دي بتؤدي لتفاعلات كتيرة بتخلق بيئة حمضية بتطرد كل انواع البكتيريا والفطريات.

ده غير ان بعد تكون سلسلة الاحماض دي بيتم انتاج مركب بيروكسيد الهيدروجين وهو المركب اللي بيعمل على التطهير الشامل لاي ميكروبات بعدها يبدأ النحل يسحب المياه من العسل.

فتلاقي شغالات النحل بيتجمعوا حوالين العسل ويفضلوا يرففوا باجنحتهم علشان يبخروا الماية.

وهي العملية اللي بتنزل المية لمستويات النشاط المائي الامنة.

والنشاط المائي ده هو مقياس لكمية الماية اللي بتسمح بنمو الميكروبات والعلماء بيحددوه من صفر لغاية واحد ومعروف علميا ان البكتيريا والطحالب والفطريات بتحتاج لتركيز اعلى من صفر فاصلة سبعة علشان تنمو وتتكاسر.

بينما بقى النحل بيقلل النشاط ده تحت السبعة من عشرة علشان يمنع عدم تسرب اي ميكروب للخلية وللسبب ده عسل النحل قديما كان بيتم استخدامه في عمليات تضميد الجراح.

وكمان بيقدر يحافظ على صلاحيته للابد واقصى حاجة ممكن تحصل للعسل ان سكر الجلوكوز يترسب ويكون بعض البلورات الصلبة واللي ممكن اتخلص منها ونرجع العسل لطبيعته لما ندفيه شوية.

وبالمناسبة دي كنتم تفتكروا ان صناعة العسل بالتعقيد الشديد ده ولا لأ؟ هل كنتم متصورين ان ممكن العسل فعل يحافظ على صلاحيته الاف السنين زي ما حصل في اكتشاف الجرار دي ولا لأ؟

السكر

اما بقى السكر وان كان طبعا اقل في المواصفات من عسل النحل الا انه بيعتبر من المنتجات المعمرة القوية وعلشان كده بيتم استعماله في صناعة المربات طويلة العمر وبنحتاج برضو ان احنا نحفظه في وعاء محكم الغلق بعيد عن الرطوبة والحرارة والضوء.

الحليب المجفف

لا شك ان الحليب الطبيعي هو الافضل في الطعم والقيمة الغذائية من الحليب المجفف لكن الحليب المجفف واللي مشهور بلبن البودرة بيكتسب فارق غير محدود لو كانت المقارنة من حيث قوة التحمل او الاحتفاظ بالصلاحية.

لكن تنبيه شديد نستثني من الكلام ده حليب الاطفال المجفف النوع ده بينصح بالالتزام بتاريخ الصلاحية بتاعته المثبت على العبوة.

مش بس كده ده كمان من المهم جدا اجراء عملية فحص ظاهري للونه وريحته.

احنا بنتكلم عن الحليب المجفف للكبار ده بيكون امن لحد كبير وخصوصا لو كان خالي الدسم وده لان الحليب المجفف كامل الدسم اضعف كتير من ناحية التحمل.

الحليب كامل الدسم ممكن يفضل سليم بعد انتهاء تاريخ الصلاحية بخمس سنوات.

اما بقى الحليب خالي الدسم وعلى عهدة المجلس الوطني لاخصائي تغذية ممكن يعمر خمسة وعشرين سنة على الاقل.

واكتر حاجة بيعتمد عليها الحليب المجفف في التخزين هي درجة الحرارة فوفقا لدراسة اجرتها جامعة يوتا الامريكية تم التأكد ان التخزين عند 10 درجات مئوية بيحافظ على الطعم والنكهة بشكل افضل في حين ان العينات اللي تم تخزينها في درجة حرارة 21 مئوية طرأت عليها بعض التغيرات في الطعم بعد سنتين.

بينما العينات اللي تم تخزينها في درجة حرارة اتنين وتلاتين درجة مئوية كان لها نكهات غير مقبولة وانخفضت فيها نسبة الفيتامينات بشكل كبير وان كانت البروتينات والمعادن والكربوهيدرات فضلت زي ما هي بدون اي تغيير.

اقرأ أيضا : أفغانستان تقهر 3 دول عظمى .